اشارك معاكم بتجربتي.."قواعد إستخراج رخصه سلاح في مصر"..! هههاءء.....

[AMARMA]

إخواني الأعزاء..شكرا علي ردودكم..وسامحوني في أي غلطات إملائيه علشان بكتب بسوفت كيبورد عربي وبتطلع عيني علي ماعملي جملتين تلاته

اولا ثقوا تماما إن أي معلومه او صوره بحطها هي ١٠٠ x ١٠٠ % سليمه وتخصني.. لا فوتوشوب ولا أي شيئ. أنا مُقدر إن من كتر الكدب إللي حولاينا حالياً يخليك تشك في ناس كتير كويسه ويتاخدو في الرجلين زي ما بنقول..

وأنا في مصر وفي حوالي ١٩٩٢ بعد ماخلصت الجيش ( كنت قوات جويه في مطار أ لماظه)
واشتغلت قلت حان الوقت للتقديم علي الرخصه..طبعا حضرت الواسطه أصدقاء للعائله لواء أمن دوله طالع معاش من كام شهر وعميد أمن دوله في الخدمه وفي فرع مهم جدا . طبعا مأمور القسم قابلني في مكتبه بمنتهي الأحترام وملفي أنا مجهزه كامل مُتكامل وتليفون لرئيس مباحث القسم "الباشمهندس طالعلك دلوئتي في مكتبك خلصله الملف ده علشان يطلع علي المُدريه في أقرب وقت.

رئيس المباحث (...قاعد في مكتب مضلم ووشه كأنه نايم في الحجز بقاله ثلاث أيام ) باشا..أي أوامر مضي ونده الأمين أول بتاع التراخيص..." ملف الباشمهندس يكمل وهيجيلك بعد أسبوع يسئلك راح المدريه ولا لسه ناقص أي حاجه". في خلال هذا الأسبوع رئيس المباحث ده جاله نقل مفاجئ ليه ما تعرفش وأعدي بعد الأسبوع أتابع الأمين يقول رئيس المباحث الجديد لسه ماطلعش الملفات إلي كان السابق مصدق عليها..! تعدي سنه ومكالمات تليفون من الواسايط وانا اعدي علي الأمين للمتابعه شوفت فيها عنده في مكتب التراخيص عاهات معاها رخص -جاين للتجديد والأضافه- منهم كمثال لسه فاكره إلي هذا اليوم سائق عضو مجلس شعب من الصعيد , لا يقراء ولايوجد أي عاقل يمكن أن يعتبره إنسان لائــق لحمل مسئوليه مش سلاح مرخص! وطبعا بتاع مجلس الشعب نفسه تلاقيه أُمي وقاعد طبعا في القاهره وكمان بيرخص للسواق في أقسام شرطه القاهره (ماهي أصلها ناقصه أرف ) بدل القسم التابع ليه سكنه إلي تلاقيه في قرقاص ولا فنطاس ( طبعا مع إحترامي لأهل قرقاص المحترمين منهم فقــــط ) .

أنا شفت الكلام ده ولم أصل معهم لعُقاد نافع قرفت من أبوهم والمناظر وكان ده سبب من الأسباب إلي خليتني أصمم إني لازم اعيش في مكان يحترم ناسه خصوصا لما يكونوا متعلمين ومحترمين نفسهم. و كندا كانت هي الهدف الرئيسي بسب إحترامها و إعتدالها بس كان لازم تكوين عدد سنين خبره في مجال مهم حتي يقبل ملف وطلب التقدم للهجره. وقد كان بعد حوالي خمس سنين قدمت في السفاره في جاردين سيتي بنفسي( ولا مكاتب محامي نصاب ولا حاجه) وفي خلال اربع شهور فقط كان معي فيزه الهجره والاقامه الرسميه.

معلش هاكمل في مشاركات جايه علشان دلوقتي الساعه ٢ صباحا يوم الأثنين ولازم أناملي خمس ست ساعات قبل مانزل الساعه ثمانيه ونص.
وإلي أن نلتقي أحب اعرفكم علي الثلاث قطع إلي ورتهم لكم في الصور فوق ..

** Winchester model 70 ultimate shadow stainless steel, bolt action 30-06 caliber. On it is a long range Leupold scope model VARI-X III 6.5–20X 50mm

** Ruguer SR1911 stainless steel 0.45 ACP caliber

** CZ 75 SP-01 Shadow, 9mm caliber with fiber optics front sights


أي اسئله بخصوص الثلاث قطع دول (أو ماشابهم) إسئلوا وأنا تحت آمركم بالنصيحه والمعلومه إلي مالأخر.. أخـــــــــــر حاجه

يتــــــــــبع....