الصيد والقانون

[أميجو]

المشاركة الأصلية كتبت بواسطة mero1x

بسم الله الرحمن الرحيم

اخوانى الاعزاء اعضاء منتدى الصيد فى مصر

انا حبيت اعمل الموضوع دة رداً على الموقف اللى حصل لأبو ياسين (استيقافة من قبل ضابط شرطة وسحب بندقيتة الرش )

الموضوع دة هتكلم فية على كل ما يخص الاسلحة سواء رش او صوت او حى علشان كل واحد منا هيكون معاة بندقية رش وماشى بيها فى الشارع يكون عارف حقوقة وواجباتة وموقفة القانونى

فى البداية انا اسمى امير سعد ومحامى استئناف وعاشق للقانون المصرى وبالذات جنائى واجراءات وملم بقانون الاسلحة والذخيرة ومتعلقاتها المام شديد

اولاً :
لازم نعرف ان الاسلحة مقسمة الى (اسلحة نارية ) و (اسلحة بيضاء) اما بنادق ضغط الهواء فلا تعتد سلاح

ولكنها تشترك مع السلاح النارى فى الشكل الذى قد يقارب 100% وهيا دى المشكلة

زى مسدس الصوت بالضبط اللى هوا اسمة القانونى (محدث صوت ) وليس مسدس او طبنجة طبقا لما هوا وارد فى قانون الاسلحة والذخيرة

المشكلة الكبرى هيا تشابة الشكل ودة اللى هتكلم فية

اولاً لازم نعرف محظورات مهمة لكل صياد

اولاُ : تلسكوب البندقية مدرج فى جدول الممنوعات ويعامل معاملة السلاح الحى
(جناية تصل العقوبة الى 15 سنة)

ثانياً : المطاوى والخناجر والسنج والزمبك( ماسورة مدببة من المقدمة )
(جنحة تصل الى 3 سنوات)

ثالثاً : الطلقات الحية وماسورة السلاح المششخنة (بها حلزونات) مجموعة الترباس فى البنادق الالية ومجموعة ضرب النار (تيتك وشاكوش وابرة)
اى منها يوجة لحاملها تهمة حيازة اسلحة نارية (متعلقات) ونفس العقوبة

يبقى نبعد عن الثلاث بنود السابقة (نهائياً) علشان نبقى فى السليم

احنا كدا انتهينا من قصة الحى والاسلحة البيضة
نرجع للرش والصوت

علشان مطولش هنجز فى صورة سؤال واجابة

س: حمل بنادق ومسدسات ضغط الهواء والصوت محتاج ترخيص
ج : لا طبعاً

س : من حق اى ضابط او عسكرى داخلية يوقفك وياخد السلاح اللى معاك للقسم على الرغم من انة عارف انة رش او صوت ؟.

ج: من حقة 100%

طب لية ( غلاسة مقننة وممكن تقول تعسف فى استعمال السلطة بنا وبين بعض لكن بالنسبة للقانون دا شايف شغلوا كويس) ) ( القانون مبيديش الحق للضابط بيان نوع السلاح لأن دى وظيفة المعمل الجنائى يعنى هيبقا عارف بس لية الحق انى يمشى فى اجراءاتة عمل محضر وتحويلة للنيابة بس النيابة هترجعلك البندقية اما لو مسدس صوت لأنة ممكن يكون ملعوب فية
زى الغشما اللى بيفتحو ماسورة الصوت ويحطوا بلى (البس يا معلم من 5 لعشر سنين وش) فهيتوجلك حيازة سلاح بدون ترخيص وتحويلة للمعمل الجنائى لبيان ما اذا كان حى او صوت ملعوب فية او صوت على ابوة)

وطبعاً الضابط اللى يعمل كدا يبقى فعلاً فاضى وعايز يتسلا

نصائح اخوية قانونية
ابعد عن الحجات اللى نهينا عنها

متصطدش فى مناطق سكنية لأن ممكن حظك يجى ف منطقة كان فيها حد اتعور ( فقد عينة من رشاية)فيها من كام سنة وتلبس قضية احداث عاهة وتعويضات تخرب بيتك وحبس

اتعامل مع الضباط بأحترام وثقة وبلاش كلمة يا باشا اعرف رتبتة ونادية يا سيادة النقيب او سيادة الرائد
مع ابتسامة (كأنة صحبك ) وبالزوق تقولة طبعاً حضرتك عارف ان بنادق ضغط الهواء مش مدرجة فى جدول الاسلحة والذخائر وانا امبارح كنت بصطاد ورا مدرية الامن واديلو حتة ابتسامة

لو مكنش شاف بطاقتك لازم هيسألك انت شغال اية .
تقولوا على وظفتك وتعرض علية خدماتك وتخدوا تليفونات بعض (واى خدمة)


اما لو كان اتم ابن 60
فتسألوا عن كارنيهة بكل اتامة

وتقولوا انتم موصلكوش اخر تعديل فى قانون 134

ولو سألك بتشتغل اية قولو مواطن واقطم

ولو اصر انك تروح معاة القسم روح معاة واول ما توصل اسأل على المأمور ولو مش موجود يبقى نائب المأمور او رئيس المباحث او المعاون واشتكى الضابط انة متعسف فى استخدام السلطة لأن البندقية مش مدرجة فهتاخد بندقيتك وتروح

وللعلم مدام متعملكش محضر يبقى بندقيتك معاك والاكلام اللى اتعمل كان هتة

والسلام ختام وارجو التثبيت من الادارة


ومتخفش بندقيتك رجعالك رجعالك

__________________________________________________ _____________________

شكرا لك على نصائحك
ثانيا بالنسبة للمعاملة فلا يفضل ذكر الرتبة أو كلمة باشا علشا ميتنفخش عليك يكفى كلمة يا فندم او حضرتك من باب الادب والذوق .
اما عن الاتامة بتاعت بعضهم فبلاش اتامة معاهم ولكن يفضل الصمت والذهاب للقسم واتباع ما سبق من تعليمات ذكرتها فى الموضوع ويمكن بالطبع بعد الخروج التوجه إلى قسم التفتيش الداخلى بوزارة الداخلية والتقدم بشكوى أو التوجه إلى النيابة وتقديم بلاغ بالتعسف وإستغلال السلطات وترويعك وإساءة المعاملة كده هيتربى الأتم أكثر وهيتعلم الادب وإفتكر تماما الحكمة التى تقول اللى بيفعل مبيتكلمش كتير لأن صمتك أمام أتمته هيخليه يفكر أنت ناوى فى دماغك على أيه ولا أنصح بالاستفزاز بمعرفتك بالقانون لأنه ممكن يرقد ليك على مصيبة تانيه أول ما توصل القسم .
تحياتى وتقديرى للجميع
وشكرا مرة أخرى على موضوعك