صورة أسلحتى

[mman2005]

أنا عملت الموضوع ده لغرض معين أن فيه عضو فى المنتدى دخل علق على موضوعى عن تصنيع السليف دفنس فى المنزل بطريقة مش كويسة وعلق على خانة أسلحتى أنى حاطط فيها مونشاكو وسلسلة حديد وشاكوكوش وقال ايه علاقتها بالصيد، مع أن إلى حاطط نوع مسدس حى ملهوش علاقة بالصيد وإلى حاطط مسدس صوت برده ملهوش علاقة بالصيد، وعلشان مش أكثر عليكم فى الكلام لما حصلت الثورة وأنعدم الأمن فى يوم جمعة الغضب وأتحرقت الأقسام ومنهم قسم السلام التابع ليه منطقتى وعرفنا أن فيه 80 مسجون هربه من قسم السلام وجايين عندنا يقتلونا ويسرقونا كل واحد نزل بحاجة فى الشارع علشان يحمى بيته ومكنشى فى بيتى وسيلة دفاع غير الشاكوش علشان أحمى بيتى ومراتى وابنى الصغير إلى كان عمره وقتها 21 يوم، ونزلنا الشارع وحمينا بيوتنا بأقل الاسلحة وكنا رجالة وكنت بنزل الساعة 3 الفجر فى الشارع بالشاكوش وأنا سامع ضرب النار فى كل مكان ومش عارف الضرب جاى منين، ومش عايز أطول عليكم فى الكلام، بعد كده نزلت أشتريت الإثنين مونشاكو وسلسلة حديد حاجة دفاع عن النفس فى البيت.

المهم الأخ المحترم بعتلى تقرير سئ قلل نقطة من النقاط بتاعتى وكتب تعليق عليها بنى أدم همجى على موضوعى بتاع تصنيع السلف دفنس فى المنزل، دخلت فى الصفحة الشخصية للعضو الفاضل لاقيته كاتب أنه طالب فى الإعدادية.
إن عضو فى إعدادى يخاطب واحد عنده 31 سنة وأب ومعاه شهادة جماعية ودراسات عليا بالشكل ده، وأحب أقوله إن الإنسان الهمجى إلى أنت بعتله تقرير سئ علشان أسلحته شاكوكش وسلسلة حديد ومونشاكو وعلشان موضوع تصنيع السليف دفنس فى المنزل راجل قدر يحمى بيته وشارعه بأقل شئ متاح فى إيديه وعيب جداً إن واحد عنده 15 سنة يدخل يعلق ويغلط بالشكل ده فى واحد ضعف عمره عندهم خبرة عنه على الاقل فى الحياة، وللأسف لما عضو فى إعدادى يدخل ينتقد حد ويتعامل معاه على أنه زميله فى المدرسة ده يخلى الواحد ملهوش نفس يدخل المنتدى ولا يشارك لأن فيه أعضاء أطفال فرحانين أن أبهاتهم شرولهم بنادق صيد ويدخله يبعته تقارير وتعليقات على ناس أكبر منهم بالشكل ده لمجرد أنى لسة معنديش القدرة أنى أشترى بندقية محترمة لأنى خارج من موضوع جواز وخلفة وعقيقة.

وأخيراً أنا هبتدى أقلل دخلوى للمنتدى ومشاركاتى حتى لا أتعرض لمزيد من قلة الاحترام والسلام عليكم.