النهاردة اول مرة فى حياتى اشوف حادث بالالى مع فان دام مصر

[elexlns1]

المكان

نزلة المريوطية من الدائرى عند الصينية امام الجامع بعد الافطار على طول

شاب وزوجته واولادة قبل الافطار حصل مشاجرة مع سواق عربية بتاعة الهرم منشية

والسواق تعدى على الشاب وزوجته وكان معاه كام واحد وطبعا الشاب أخد عياله ومشيوا

وقاله بعد الفطار نتقابل هنا ومش هسيبك

دة اللى سمعته من الناس بعد الحادث

وقت الحادث كنت راكب العربية انا وواحد جارى وفجأة لقينا الطريق وقف

اتارى الشاب متربص للعربية والسواق ولما لقاهم جايين قام طالع عليهم لوحده

وطبعا السواق كان محمل العربية شوية عيال شكلهم مساجين ومعاهم اسلحه بيضاء


المهم

فجأة ظهر الشاب ولابس بنطلون صاعقة وشكله ابن ناس جداااااااااااااااا

ومعاة عربية شيروكى وطلع منها بندقية ألى


وقعد على ركبه وضرب فيهم زى المطر

والعيال ملحقتش تعمل اى حاجة

وشوفت عربيتهم بتتنطط من الرصاص

لمدة خمس دقايق تقريبا والصويت والصريخ كان زى الزعر ومشهد مرعب

لدرجة صوت الناس داخل الجامع والهرجلة كان حاجة فظيعة

راجل واقف واتصل بالشرطة قالوله سيبهم يموتوا بعض

وقام الشاب من على ركبه وركب عربيته ومشى ولا كأن حاجة حصلت

والله اعلم بالباقى ولمدة نص ساعة ولا شرطة جت ولا اسعاف ولا اى حاجة

ومشيت ومعرفش اية اللى حصل

والناس بتقول ان فى حرب بالالى فى باسوس النهاردة

وناس صحابى فى امبابة بيقولوا فى حرب عندهم بين عيلتين فى منطقة العمارة

وفى امرأة ماتت قبل الافطار

فين الشرطة من دة كله

[sultan]

الشرطه صيمه بعد العيد بقى نشوفهم على خير

[hard]

بصراحة الشاب ده راجل ومعاه حق فى كل اللى عمله بس هو ضرب نار على العربية بس ولا على السواق والبلطجية؟

[عادل عبده]

ياعزيزى الاكسلنس الشرطه بتسيبهوم يموتو بعض وبعد كده يروحو يلمو الجثث ويعملو محاضر ويحولو يجيبو النتسبب فى المشكله واما تيجى تقولهوم مدخلتوش فى الخناقه ليه يقولك بدل ما نتعور ولا نموت وملناش ديه سيبهوم يموتو بعض واللى يموت يموت واللى يقتل نبقى نجيبه من بيتهوم

[Ahmed El Sarky]

يا باشا الشرطة عايزة كدة .............. يعنى لو عاوزين يمسكوا البلطحية ها يمسكوهم وهما عارفين اماكنهم بس هما عاوزينها تولع

[elexlns1]

المشاركة الأصلية كتبت بواسطة hard

بصراحة الشاب ده راجل ومعاه حق فى كل اللى عمله بس هو ضرب نار على العربية بس ولا على السواق والبلطجية؟

ضرب فيهم كلهم

مش عشوائى لان الناس كانت ملمومة ومحدش اتعور

هو ضرب فى العربية والعيال اللى فيها كلهم

[elexlns1]

الواحد لما يسمع غير لما يشوف بعينه

اية اللى بيحصل دة وليه الشرطة مفيش فى قلوبها رحمه

[تاجر جملة]

حسبنا الله ونعم الوكيل

[صقر ابوحسانين]

ههههههههههههه حقه وياخده بمعرفته يعم هى جت على دى ربنا يسترها وتعدى على خير من المشاكل ده حلو دى بندقيه الى موش حاجه عندنا الخناقات دلوقتى كله جايب الهاى لوكس 4*4 ومركبلها قاعده جرينوف والضرب بيكون ذى الرز يارب يتلم الموضوع ده على خير ولا نجبر على استخدام السلاح والبيوت تخرب

[smsmn8888]

معلش بقي الدنيا صيام يعني انت عايز الشرطة تفطر علي شوية العيال دي عيب

[elexlns1]

عندك حق برضوا

[دكتور عابدينوف]

المشاركة الأصلية كتبت بواسطة elexlns1

المهم

فجأة ظهر الشاب ولابس بنطلون صاعقة وشكله ابن ناس جداااااااااااااااا

ومعاة عربية شيروكى وطلع منها بندقية ألى


وقعد على ركبه وضرب فيهم زى المطر

والعيال ملحقتش تعمل اى حاجة

وشوفت عربيتهم بتتنطط من الرصاص

والله الراجل دا برنس
بس الشرطة والله طول عمرها كدا حتى من قبل الثورة
والقانون الى لا بيحميك ولا يديك الحق تحمى نفسك مكانه تحت الجزمة

[ahmedmh_ali]

المشاركة الأصلية كتبت بواسطة sultan

الشرطه صيمه بعد العيد بقى نشوفهم على خير

هههههههههههههههههه لا حلوة

[ابو مروان]

الزميل الاكسلنس انا ملاحظ ان معظم موضوعات حضرتك عن خناقة فى امبابة ومدبحة فى السيدة زينب و معركة على الدائرى؟؟؟؟ بتفكرنى بصديق ليا كان يتصل بيا ويقولى انا واقف قدام البنك المركزى وهة بيولع_انا عند التليفزيون وفية مجزرة _انا قدام محكمة التجمع والناس بتاكل بعض. موش غريبة دى؟؟ يا اخوانى هاتو اى صفحة من صفح اخبار الحوادث السنة اللى فاتت هاتلاقوا بلاوى ربنا يحفظنا بس ما حدش كان واخد بالة وبعدين هو من امتة الشرطة فى مصر بتيجى بدرى اذا جت من الاساس دة حتى فى الافلام العربى بتيجى متاخرة _تيرى تيرى تيرى تيرى _والفيلم بيخلص

[elexlns1]

المشاركة الأصلية كتبت بواسطة ابو مروان

الزميل الاكسلنس انا ملاحظ ان معظم موضوعات حضرتك عن خناقة فى امبابة ومدبحة فى السيدة زينب و معركة على الدائرى؟؟؟؟ بتفكرنى بصديق ليا كان يتصل بيا ويقولى انا واقف قدام البنك المركزى وهة بيولع_انا عند التليفزيون وفية مجزرة _انا قدام محكمة التجمع والناس بتاكل بعض. موش غريبة دى؟؟ يا اخوانى هاتو اى صفحة من صفح اخبار الحوادث السنة اللى فاتت هاتلاقوا بلاوى ربنا يحفظنا بس ما حدش كان واخد بالة وبعدين هو من امتة الشرطة فى مصر بتيجى بدرى اذا جت من الاساس دة حتى فى الافلام العربى بتيجى متاخرة _تيرى تيرى تيرى تيرى _والفيلم بيخلص

علشان ممكن حضرتك مش شايف اللى بنشوفه

[اسامة]

المشاركة الأصلية كتبت بواسطة sultan

الشرطه صيمه بعد العيد بقى نشوفهم على خير

هههههههههههههههههههههههههههههههههههههههههههههه

[راندى اورتن]

لا اله الا الله

[hema777h]

لو حصل كدااا فعلامن شوية العربجية بتوعو الميكروباص يبقي يستحقو كدااا الواحد لو حصل مشكلة مع حد ولاقاء معه حد كبير في العربية ولا معاة اهل بيتة بيجي علي نفسو ويمشي ........

[shadymageed]

شبه اللى حصل النهرده يا hema 777 بس ده كان فى ضرب نار واللى كنا فيه ضرب بالايادى ههههههههه

[hema777h]

المشاركة الأصلية كتبت بواسطة shadymageed

شبه اللى حصل النهرده يا hema 777 بس ده كان فى ضرب نار واللى كنا فيه ضرب بالايادى ههههههههه

انا كنت عايز الحق اديلو سلف في عينو اول ما طلعت برة بس ملحقش اوصلو لاني شفتو بيلف الدركسيون وهيجري ستر ربنا انو مكنش في ناس واقفة في الطريق وهو بيجري الحمد لله

[سامح عاشور]

سبحان الله, الناس عمالة تقول جدع وبرنس على إيه, ده قتل نفس بغير حق, حتى لو يستاهلوا ضرب الجزم بس مش القتل, الدم مش سهل يا إخوانا.
حتى لو يستاهل القتل شرعاً وعرفاً هناخد حقنا بإيدينا؟؟
يعمل كمين ويموتهم وهو مش مضطر.
لا حول ولا قوة إلا بالله.

ده يستاهل إعدام.

[ahmedalim]

ربنا يستر علينا دلوقتى اى واحد معه رشاش الى على طول