المواجهه الثانيه للبطلجيه وعدت بسلام الحمد لله

[hoka]

السلام عليكم
انهارده من ساعه كنت نزلت اصطاد لوحدى لانى كنت مواعد هيما وللاسف غدر بيا ومجاش
نزلت واتمشيت واليوم حلو بس البندقيه بمزاجها كالعاده واليمام قليل اوووووى يعنى ضربت بالظبط 10 رشات
بتمشى لقيت ابوسمير(عبدالله) بيكلمنى بيقولى انا جايلك قلتله تنور مستنيك
قلت فى عقلى طب ما اخد لفه سريعه افتح اليوم عقبال ما عبدالله يجى
لفيت وكالعاده فيه ناس كتييييييييير بس خلاص اتعودو عليا وانا بسبق بالسلام والموقف عادى خالص
لحد ما لقيت بيت دور واحد فوقيه حمام كتيييييير اوى بتاع ناس وهم عارفين انى مش بضرب حمام طبعا بس قدام البيت 3 يمامات
قلت يللا بينا
كان واقف شابين وواحد شايل طفل استأذنته طبعا ودخلت ع اليمام
الاولى مجتش
كسرت البندقيه وحطيت الرشايه ملحقتش اقفلها
هههههههههههههههبــــــــــــــــــــ عربيه نص نقل محمله 6 اشخاص وتقريبا 2 قدام طالعين من شارع جانبى ولقيته بيهدى عندى وانا عادى مستنيه يعدى علشان اضرب اليمام لقيته بيقوله(كمل كمل على طول مفيش حاجه)
قلت عادى بيهزرو مع بعض
لسه برفع البندقيه وبختار الهدف لقيت العربيه وقفت على مسافه 60 متر وطلقه خرطوش اتضربت
طراااااااااااااااااااااااااااااااااااااااااخ طيرت اليمام والحمام والطفل الصغير اترعب والشابين وانا شخصيا بس للامانه انا افتكرتها كاوتش عربيتهم فرقع لقيتهم كملو 10 متر ووقفو ونزلو من العربيه روحت ع الشابين قلتلهم ضرب نار ده صح؟؟ قالولى تقريبا لان اصلا فيه خناقه هنا وشكلهم جايين ياخدو حد
فضلت اتناقش معاهم عاوز اعرف السبب يعنى للبلطجه ديه
لقيت الناس كلها بتبص من الشبابيك وصاحب البيت بتاع الحمام بص هزرت معاه علشان يهدى قلتله (والله رش مش خرطوش ) قصدى ع البندقيه بتاعتى
ضحكلى وقالى ما انا عارفك مفيش حاجه بس ايه ده
شرحتله مكملناش دقيقه الشارع بقى مليان شباب وكده لقيت شاب بيقولى دخل البندقيه عندى البيت لحسن يفهموك غلط ويشوفوك رافع البندقيه عليهم يضربوك من هناك
ضحكتله وقلتله يا عم لو كانو عاوزين يموتو كانو ضربونى لما عدو من قدامى عادى عادى
طبعا مشيت وكنت بهزر لان الناس بقت كتير وخفت ليفهمونى غلط او يترعبو منى انا فمشيت
يدوبك مكملتش شارعين سمعت صوت طلقتين تانيين
هم طبعا فرد محلى معفن وفى الهوا كمان بس بجد انا زهلان على انى وقفت عاجز والناس ديه بترهب السكان كده حتى لو مش عاوزين شر للمنطقه ديه بس بردو بلطجه بالسلاح
وانا كانت فى دماغى فكره بقالها اسبوع خاصه بعد حال النفق الزباله اللى عندنا والبياعين اخدو الارض اكنها خلاص ملك واتكتبلهم
كنت عاوز اتعاون مع الجيش والشرطه ينتقو 1000 شاب مثقف ومتعلم ويعملوله اختبارات بدنيه وعقليه ويدربوه لمده شهر على مهارات القتال بشتى الطرق
وبعدين الالف دول يبقو فرقه خاص بمنطقه امبابه لفض اى اشتباكات وكمان دفاع مدنى داخلى للمنطقه وخاصه انهم ينفعو اوى بدل البلديه زمان قبل الثوره ونشيل البياعين اللى مخليين امبابه زحمه اوى وشكلها بقى مزبله اخر حاجه
طبعا هى فكره صعبه بس مش مستحيله وخاصه ان الناس اللى على غلط بتخاف واللى على حق بيبقى شجاع واحنا ان شاء الله على حق وهانعمل مساعده ليهم ومش بعيد ننزل على بتوع البرشام والمخدرات والبلطجيه بالتنسيق مع الشرطه ونلمهم كلهم وننضف امبابه
علشان حتى فى الانتخابات الجايه بتوع الحزب الواطى ما يأجروهمش ويرهبو الناس وخاصه ان المقروطه والفرد دول منتشرين اوى وسهل اوى يرهبو بيهم اى شخص
بالنسبه لل1000 شاب دول هايبقو فوق سن ال18 طبعا ومؤهله عالى حبتين علشان يبقى عاقل طبعا وكمان بعد الكشف يتم الموافقه او لا
ويتسلحو بكل الاسلحه اللى هايتدربو عليها وان شاء الله ما يستخدموهاش
وكمان لبس خاص ليهم وصديريهات مضاده للرصاص علشان ارواحهم غاليه واحنا مش هدفنا نقتل بعض بس هدفنا نمنع اى بلطحه باى صوره اى كانت
ال1000 دول ممكن يتغيرو كل شهر ويعملو لجان شعبيه على مداخل امبابه ويكون بينهم اتصال ومركز ليهم للتجمع واخد الخطط وكده
تقريبا زى فرقه جيش بس بسيطه ومن اهل المنطقه علشان ميبقوش كارهين الحكايه وانا واثق ان اهل امبابه كلهم هايرحبو بيهم
ديه كانت فكرتى واللى نفسى احققه علشان بجد ننضف امبابه وكل مناطق مصر ونفسى تتحقق فى كل مصر ووالله لو اتحققت كل ام وكل اخت وكل اب هايمشى فى الشارع مطمن لان ابنه بحميه واكيد هايخاف عليه اكتر من اى حد تانى اى كانت وطنيته
علشان كده قلت يبقو مننا ولينا
بس
ارجو مكونش طولت عليكم ومستنى ارائكم
سلام عليكم

[hoka]

معلش نسيت اقول ان عبدالله جالى وكملت طبعا طلعتى والحمد لله ربنا نصفنا بيمامتين حلوين غير 3 فوق اسطح ومسروقين وبردو البنادق بمزاجها
عارف ان لو احمد معايا كان زمانه رووووووووووووووووووح فى اقرب توك توك لانه مش بيحب جو القلق ده بس انا مش بيهمنى لان العمر بيد الله وانا مش بعمل حاجه غلط وبالعكس لو هم بلطجيه ووقفت قدامهم ببندقيتى الرش وصيبت واحد فيهم حتى لو تعويره ممكن يخافو ويجرو واكون كسبت ثواب
كل الاحتمالات وارده واهم شئ حب الصيد والسلاح والثقه فى النفس وفى ربنا قبل كل شئ
الحمد لله

[سامح عاشور]

بعد رمضان, على العيد وعلى التنقلات الجديدة إن شاء الله الجيش والشرطة مش هيخلوا ولا بلطجية ولا بياعين.

[hoka]

يسمع من بقك ربنا نفسى والله
وامبابه بالذات شوارعها واسعه جداااااااااا بس لما تفضى من شويه الناس اللى بجد لا ثقافه ولا ادب ولا اخلاق ولا دين ولا علم ولا اى حاجه انسان بهيمى يأكل ويتكاثر وفقط
ربنا يهديهم
شكرا جزيلا يا افندم ع الخبر الحلو ده ويارب يبقى حقيقه

[ahmadkhalaf]

فكرة جامدة يامعلم حوكا بجد ........ تحياتى ليك

[smsmn8888]

هم مش محتجين يدربو حد الان اي حد بيقدم في الجيش بيلبس علاطول دون نقاش وفترة التمرين اسبوعين

[hoka]

شكرا يا شباب ع الردود بس الفكره لو اتنفذت صح وبحبه تعديلات هاتساعد فى حاجات كتييييييييييير اوى اولها احنا كصيادين

[ابو مروان]

الخوف يا زميلى العزيز ان الالف دول يتحولو لبلطجية ويفرضوا اتاوات على الناس لانهم فى الوقت دة هايشعروا انهم هم اللى بيحموهم ونرجع لايام الفتوات بتوع زمان فتوات امبابة وفتوات السيدة والمدبح وكدة_وبعدين الشباب دول هايكونوا متطوعين والا بمرتب؟؟؟ وتبع اى وزارة؟؟؟ ولما هما ياخدوا مرتبات بتوع الداخلية يعملوا اية ؟ ما يشتغلوش والشعب يحمى نفسة بنفسة_الامن هايرجع لما الداخلية ترجع وما يصعبش علينا بقى لما يمسكوا بلطجى او حرلمى ويقعد على الكهربا وينضرب بالكرباج لاننا جربنا البلطجية والحرامية والناس المستبيعة ما ينفعش معاهم فعلا غير الكهربا والكرباج ولا حقوق انسان ولا كلام فارغ حقوق الانسان للمواطن المحترم الشريف الشغال اللى بيدفع ضرايبة الملتزم بالقانون اما الناس التانية الكلاب الضالة بالبرطوش

[adel152]

المشاركة الأصلية كتبت بواسطة سامح عاشور

بعد رمضان, على العيد وعلى التنقلات الجديدة إن شاء الله الجيش والشرطة مش هيخلوا ولا بلطجية ولا بياعين.

أنه تنقلات اللى بعد رمضان؟
ماخلاص التنقلات الخارجية والداخلية للشرطة تمت من اسبوعين ياباشا وكل سنة وحضرتك طيب.

[hoka]

المشاركة الأصلية كتبت بواسطة ابو مروان

الخوف يا زميلى العزيز ان الالف دول يتحولو لبلطجية ويفرضوا اتاوات على الناس لانهم فى الوقت دة هايشعروا انهم هم اللى بيحموهم ونرجع لايام الفتوات بتوع زمان فتوات امبابة وفتوات السيدة والمدبح وكدة_وبعدين الشباب دول هايكونوا متطوعين والا بمرتب؟؟؟ وتبع اى وزارة؟؟؟ ولما هما ياخدوا مرتبات بتوع الداخلية يعملوا اية ؟ ما يشتغلوش والشعب يحمى نفسة بنفسة_الامن هايرجع لما الداخلية ترجع وما يصعبش علينا بقى لما يمسكوا بلطجى او حرلمى ويقعد على الكهربا وينضرب بالكرباج لاننا جربنا البلطجية والحرامية والناس المستبيعة ما ينفعش معاهم فعلا غير الكهربا والكرباج ولا حقوق انسان ولا كلام فارغ حقوق الانسان للمواطن المحترم الشريف الشغال اللى بيدفع ضرايبة الملتزم بالقانون اما الناس التانية الكلاب الضالة بالبرطوش

سلام عليكم
يا افندم ل1000 دول اولا من خيره شباب امبابه يعنى مش بتوع برشام وحشيش علشان يبلطجو ولو كانو هايبلطجو كانو بلطجو فى اللجان الشعبيه
كمان اصلا اصلا هم هايبقو تحت امر الجيش اكنهم فى الجيش بالظبط بس فى منطقتهم
ولبسهم وتسليحهم وتدريبهم من الجيش وحضرتك عارف الجيش واحكامه العسكريه
غير ان كمان ال1000 دول مجرد مساعده للشرطه من اهل المنطقه بس بعلم الجيش والداخليه وكمان لحفظ الامن فى المنطقه والنظام
نيجى لحكايه التعذيب فاصلا كدين اسلامى مينفعش اللى حضرتك بتقوله
اخرنا نطبق حد الله ونسيب المجرم ده فى حاله طالما ربنا امرنا بتطبيق شرعه وبس
لكن طبعا اللى هايبلطج هايتبعت ع القسم يتحبس وفقط
ومش علشان هو بلطجى او بتاع برشام يبقى قتله حلال لالالالا طبعاااااااااا ده مخالف للشرع اى كان ده حتى اليهودى لو سلم سلاحه حرام عليك تقتله ولا ايه؟؟
المهم ان الفكره ديه شكلها هاتطبق قريبا فى حال تدهور الاوضاع فى مصر داخليا وخارجيا وده علشان نحمى البلد مش تتحرق وتتسرق زى ايام الثوره
شكرا جزيلا لرد حضرتك وارجو تكون فكرتى وصلت

المشاركة الأصلية كتبت بواسطة adel152

أنه تنقلات اللى بعد رمضان؟
ماخلاص التنقلات الخارجية والداخلية للشرطة تمت من اسبوعين ياباشا وكل سنة وحضرتك طيب.

ههههههههههههههههههههههه
لا هو تقريبا فيه تنقلات تانيه بس اصلا كانت الاولانيه جابت نتيجه علشان التانيه تعمل حاجه؟؟
الشرطه مأنتخه فى الاقسام والتكييف وبس

[سامح عاشور]

المشاركة الأصلية كتبت بواسطة adel152

أنه تنقلات اللى بعد رمضان؟
ماخلاص التنقلات الخارجية والداخلية للشرطة تمت من اسبوعين ياباشا وكل سنة وحضرتك طيب.

بس لسه ماعملوش حاجة, قاعدين مأنتخين.

بعد العيد شوف القرارات والتنفيذ

[adel152]

المشاركة الأصلية كتبت بواسطة سامح عاشور

بس لسه ماعملوش حاجة, قاعدين مأنتخين.

بعد العيد شوف القرارات والتنفيذ

استاذ سامح بعد التحية
اللى عايز ينفذ مش مستنى قرارات خاصة لما الموضوع يكون خاص بالامن والامان للشارع المصرى.
حضرتكم لو شوفتم حال اسكندرية (عروس البحر المتوسط) بقى أزاى حاليا صدقونى اكيد حتزعلو قوى.
انا كانت اكتر حاجة بتباهى بيها لما كنت فى الخارج هو الامان فى مصر.
ربنا يهدى وترجع بلدنا زى ماكانت واحسن ان شاء الله.
تحياتى

[سامح عاشور]

المشاركة الأصلية كتبت بواسطة adel152

ربنا يهدى وترجع بلدنا زى ماكانت واحسن ان شاء الله.
تحياتى

يااارب
رب إجعل هذا بلداً آمنا وارزق أهله من الثمرات

[عادل عبده]

انت عارف حصلك كده ليه يا حوكا
عشان انت مختنيش معاك يا مان

وفكره الالف شاب ديه انا معاك فيها وممكن اقدم معاك لو فى خطوه ايجابيه

[hoka]

ارجو من الاداره حذف الموضوع

[سامح عاشور]

فيه إيه يا باشا زعلان مننا ولا إيه؟

[hoka]

لا طبعا يا افندم ما اقدرش ازعل من حضراتكم
كان سوء تفاهم واتحل الحمد لله
شكرا جزيلا لحضرتك

[ahm_matrix]

فكرة جميلة جدا بس مين يسمع وينفذ