رساله إلى كل واحد عاوز مسدس حي

[Ebrahim Al Ansari]

السلام عليكم

قبل ما أتكلم... لازم تعرف إني سمعت كلامك... مهو مش هينفع أتكلم قبل ما أسمعو... إسمعنى إنت بقى

والله سمعت كلامك وفكرت فيه....

إيه بتقول كان فى ناس بتقول كلام تانى؟؟؟.....

ما أنا سمعت كلامهم هما كمان وفكرت فيه....

بالله عليكم إسمعونى زي ما سمعتكم....
إسمعوني بقلوبكم وبإهتمام زي ما سمعتكم بقلبي وبإهتمام فى كل موضوع إتكلمتم فيه عن السلاح الحي....

أنا كل اللى هعمله إني هفكر بصوت عالي... يمكن كلامي يعجبك ويمكن لأ... يمكن يناسبك إنت بس ميناسبش غيرك.. يبقى نسمع كلنا وكل واحد يقرر بينه وبين نفسه بعد ما يفكر فى الكلام ويقرر بينه وبين نفسه هوا هيعمل إيه...

فى الأول أحب أقولك إن كلامك... وكلامهم هما كمان صح.. ومقتنع بيه.. وحاسس بيهم... مهو والله العظيم أنا كمان حالي زي حالهم وحاسس بيهم لأني لبرهه من الزمن فكرت زي ما هما بيفكرو وكان كل تفكيري إنى عاوز مسدس صوت أو حي ويمكن ده هوا اللى ربنا جعله سبب فى إنى الاقي و ادخل المنتدي الرائع ده أصلا رغم إنى طول عمري لا بحب المنتديات ولا الفيس بوك ولا الكلام ده كله (نظراً لأن شخصيتي كده وإن أغلب المنتديات اللى شفتها البعد عنها غنيمه) ولكن بعد ما دخلت المنتدى ده وشدني رقي أعضائه وقررت أستمر فيه وقرأت آراء الناس بين مرحب لفكره مسدس الصوت ورافض لها كوسيلة حمايه.. إقتنعت بالرفض وقررت أتراجع عنها كوسيلة حمايه بس برضه هجيب واحد بعدين عشان أنا بحب المسدسات والسلاح من صغري بس مش للحمايه..

وبعد كده فضلت فكرة السلاح الحي تدور فى رأسي ووجدت نفسي لا أستطيع التفكير إلا فى الآتي كله... بداية من العواقب القانونيه... هل معايا ثمنه أو هعرف أتصرف وأجيب ثمنه حتى لو هستلف.. ولو فرضنا إني جبت ثمنه.. هل أي شخص زي حلاتى غير مدرب على إستخدام سلاح حي هيعرف يستخدمه؟.. طيب لو فرضنا إني إتدربت عليه وده مستحيل فى الظروف دى بس جدلا إتدربت على استخدامه.. هل هقدر أستخدمه بالسرعه المطلوبه فى حالة حدوث خطر؟؟ هطلعه وألغي الأمان وأشد الأجزاء وأنشن وأضرب وأنا متوتر وأنا تحت ضغط عصبي؟؟ وطبعا من المعلوم إن أفراد الشرطه والجيش أهم جزء من تدريبهم ليس على الإستخدام وإنما على الثبات النفسي فى وقت الخطر.. طيب لو فرضنا جدلاً برضه ومش بهزر وبتكلم جد إنى من كتر الفرجه على الأفلام الأكشن خلاص بقى فى ثبات نفسي ومش هتهز.. هل هقدر أعيش وأتعايش مع عواقب إصابه حد بطلق ناري قد يكون سبب فى موته.. هل هستحمل تحقيق فى الموضوع حتى إن نتج عنه عدم إدانتي لأني فى حاله دفاع شرعي عن النفس مع العلم إنى هتحاسب ساعتها على الحيازه بدون ترخيص كقضيه منفصله واتحاكم عليها.. ولو فرضنا إني هطلع برائه.. هل هستحمل تأنيب ضمير وإني أعيش إيدي ملطخه بدم إنسان وحتى لو كان مجرم وإبن ستين كلب وأنا فعلا مقدرش أدبح فرخه أو خروف.. هل هستحمل قلق وخوف من إنتقام المجرم المصاب وزمايله البلطجيه باقي العصابة.. أو من إنتقام أهله لو كان مات ومطالبتهم بالتار وده وارد جداً.. هل عندي قدره على إنى أواجههم لو رجعوا عشان ينتقموا.. وساعتها هتضر أكتر أنا وأهلي ويمكن جيراني كمان؟؟؟

بعد الأسأله دى كلها لقيت إني مش هقدر ولا هستحمل العواقب.. وقررت أرمي حملي على الله وأدعي إنه يحفظنى ويحفظ أهلي ويحفظ كل مكروب وكل واحد عايش فى قلق أكتر من اللى أنا عايش فيه لأني عارف إنى فى نعمه.. وغيري فى المناطق والبلدان المقطوعه.. وغيرهم.. وغيرهم.. حالتهم أصعب.. ومنهم اللي شاف الموت فعلا وهيتجنن خلاص ومش عارف يعمل إيه.. وبقى خلاص بيكلم نفسه ويقول.. (الفلوس فى ستين داهيه.. أنا مش مهم.. أنا اموت بس محدش يلمس شعره من أهلي)....... والناس المحتاره دي منهم كتير ويمكن أغلبهم زي حلاتى مش هيقدرو يستحملو العواقب وهيقولو يا رب زي ما انا بقول..

فيا رب إحفظنى وإحفظ كل مكروب

لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ



.