استغلال التجار

[محمد مصطفى عبدالرءوف]

السلام عليكم أعضاء المنتدى الأفاضل

حبيت أعرض عليكم تجربتي في شراء مسدس صوت لأكشف بها التجار المستغلين الذين قابلتهم في البداية ذهبت إلى المنتدى الدولى للصيد والغطس اللي عند تقاطع شارع شريف مع صبري أبو علم بجوار وزارة الأوقاف، أخويا كان اشترى من عنده مسدس صوت بروني 85 يوم 29 يناير بـ1500 جنيه ومعاه علبة طلق تركي بـ 250 جنيه .. ولأنه مكانش عارف الأسعار فاعتقد ان دا سعر المسدس العادي.. المهم لما رحت لقيت البروني 85 وصل 1800 ، والبروني p4 وصل 2000 والطلق وصل 400 جنيه وبعدين نزله تدريجيا على مدار كذا يوم لغاية لما وصله 250 تاني.. والايكول جاكول دول السريع سعره كان 3000 وبعدها بيوم واحد كان 3200 جنيه .. أه والله 3200 جنيه، دا بالاضافة إلى المعاملة السيئة من أصحاب المحل وهم 3 أخوات على ما اعتقد.. فلما سألته ليه 3200 دا انا اعلى سعر سمعته للمسدس دا كان 2000 وفي ناس لسه بتبيعه 1200 و 1500 .. شد المسدس من ايدي وقال روح اشترى من عندهم دي الأسعار اللي عنده لو مش عاجبك مع السلامة
وعملت جولة على المحلات علشان اشترى فزادت حيرتي.. منسي عنده الكيمار الايطالي وهو نوع محترم بس سعره بين 2500 - 3000، والبروني P4 عامل 2000 ومش عنده، والايكول السريع عامل 2500 .. زائد أنواع تركي وايطالي تانية اسعارها من 1500 وانت طالع ..
فتح الله اللي في عبد الخالق ثروت .. المعاملة جافة تماما وبيدخل الناس بالدور اتنين اتنين.. وساعات مش بيرضى يدخل حد وبيبيع من على الباب ويديك المسدس في كيس بلاستيك من غير علبة ولا أي حاجة معاه.. وحجته في دا انه اتسرق في الأحداث.. ومش بيشتغل في الايطالي اساسا.
محلات بوندي أبو ضيف .. عنده أنواع تركي مش منها الايكول السريع .. والبروني p4 كان عامل عنده 1500
ميشيل عازر اللي في العتبة .. رغم ان المحل صغير وزحمة إلا أنه كان أرخص الأسعار في الأول.. مبدئيا هو مش بيشتغل في التركي بس البروني عنده انا جبته يوم الخميس اللي فات ب1200 بعد الفصال لأنه كان عاوزه بـ 1300 والطلق الألماني بـ200 جنيه العلبة .. لكن النهاردة الاثنين 7 مارس رحت مع واحد صاحبي علشان يجيب البروني p4 من عنده وصل 1750 ومش بينزل فيه جنيه .. والبروني الجاب عنده بـ 1500
المهم أدركت أن أخويا اتضحك عليه، لما دخلت على المنتدى دا ، وبفضل الله والاستاذ بدر أكرمه الله عرفت الفرق بين الأنواع وأسعارها الحقيقية ، واتصلت بالاستاذ هشام سمير لأشتري منه البروني والايكول السريع بسبب بسبب بعد المسافة وعدم توفيق المواعيد لم يكتب لي لقاء هذا الشخص المحترم جدا .. وإن كنت مصر على لقائه لأشكره، انا جبت بروني p4 ب1200 من عازر زي ما قلت.. وجبت الايكول السريع ب 1400 بعد فصال من فتح الله والكلام دا الأسبوع اللي فات ..
النهاردة نزلت مع صاحبي فتح الله مش عنده ايكول سريع خلاص .. وعازر والمركز الدولي للغطس زودوا الأسعار بشكل جنوني
أرجو من كل من تعرض لاستغلال من التجار الجشعين كشف أسماءهم حتى يستفيد أعضاء المنتدى من التجربة ومحدش يشتري منهم ..

[memocco]

فتح الله دة طلع سئ جدا فى المعاملة و حاجتة غالبا مركونة ...و مش فتح الله بس دة غالبا كل المحلات كدة الحاجة عندهم مركونة من زمان لان لو تلاحظ كل المسدسات عليها زيت كتير جدا فوق الطبيعى و تحس انهم متركبين على بعض .. يعنى وش مسدس جديد على جسم مستعمل !!!!

[osha966]

مشاركة مفيدة واشكرك أخى الكريم على الأفادة-واشاركك الرأى فى جشع التجار المصريين وهى عادتهم من قديم ال 30 سنة الفاتت-ويارب يصلح حال مصر بقى ونشوفها بلد زى بلدان العالم قبل ما نموت

[hemi afifi]

فعلا فتح الله هنا في اسكندريه اغلي واحد و المعامله بتختلف من محل للتاني

[mlikhunter]

السلام اود ان ابين لكم بان سعر الصوتي عندنا بحدود 40 $ للعلم وكم بزيد التجار عندكم

[osama2011]

ما احنا اللي بنعمل في نفسنا كده
جرينا ورا الحاجة باستموات هو اللي بيخللي التاجر يعمل كده واكتر وياريتها حاجة مفيده دي حاجة مالهاش لازمه اساسا خصوصا بعد ما كل من هب ودب دلوقتي معاه مسدسين تلاته صوت لدرجة ان الواحد لو صادف حد معاه مسدس حي فعلا مش هايصدق وهايفتكرة صوت
ياريت يا جماعه نهدي وعمر ما مسدس الصوت حمي حد عشان تكونوا عارفين
بس للأسف دي طبيعه في بعض الناس

[mohreda]

اسف لتاخري في الردود اليوم لانشغالي و عدم ايجاد وقت لشراء طلقات و عمل الفيديو

موقتا ...........ديه صور للماسورة و كما ذكرت من قبل فقط ازلت الطبة الامامية دون اي تعديل اخر نهائيا