بشاير البياض النيلى بالصور

وليد سالم · 14-09-11, 04:14 AM

اقتباس:

المشاركة الأصلية كتبت بواسطة dr_mohasan

الله ينور يا ابو مروان ، بسم الله ما شاء الله
فهمنى بقى لو سمحت معنى الجملة دى "وجربت اكتر من دور"
يعنى ايه دور ؟
و تحياتى ليك و تمنياتى بالتوفيق الدائم

بعد اذنك يا ابو مروان

الدور يا صديقي هو عباره عن مكان بجانب حافة الماء بيجهزه الصياد لنفسة قبل الصيد وفي صيادين بتجهزه قبل الصيد بعدة ايام وبتقوم بتنظيف المكان من ( الزلفه ) بمعني الاعشاب والعوالق المتوقفة في الماء بالمكان اذا كانت اعشاب نيلية او حتي اكياس بلاستيك او خلافة واذا كان في اسلاك حديدية ملقاه في الماء بتتشال بره عشان الخيط مايشبكش فيها كل شوية وينقطع ده طبعا لو المياه مش غويطة

وبعد كده كثير من الصيادين بيحضروا معاهم شنط ( علفة ) وهي عباره عن ( قمح مسلوق - ردة خشنة ) مخلوطين علي بعض ويتم رمي القليل منهم علي حرف المكان لجذب الاسماك علي رائحة القمح والرده

بس بشرط ان القمح مايكونش مستوي والحبه بتاعته مقفولة مش تكون اتفتحت اثناء السلق واتهرت من غلي الميه
والرمي للسمك اسمة تزفير الدور وبيكون حبه قليله تقريبا مليئ كف اليد فقط عشان السمك ما يشبعش منه ويذهد الطعم بتاع السناره واستخدام السناره في المكان مستحب انه يكون بعد عملية التزفير بربع ساعه تقريبا
وتكون المياه مش حامية بمعني مش سريعة الحركة عشان متاخدش العلف وتمشي بعيد وكانك يا ابو زيد ما غزيت ولو المياه حامية ملوش داعي التزفير وملوش داعي بردوا استخدام الغماز في السناره والشغل بالحداف احسن بدون غماز