النهاردة أشتريت رش من ميشيل عازر

[mman2005]

وأنا فى الشغل قلت لو خرجت النهاردة بدرى هنزل أشترى رش جامو ماتش على رش مصرى، رحت متصل بمشيل عازر، سألته على الرش الجامو ماتش قالى 25 جنيه للعلبة الى فيها 250 رشاية نمرة 2 وقالى عنده الرش الجامو المدبب، ومعندهوش رش مصرى، بعد كده أتصلت أحمد محمد منسى قالى عنده المارسمان العلبة ب 7 جنيه ومعندهوش جامو، فكرت قلت خلينا فى الجامو يعتبر على كده أرخص من المصرى لما علبة المارسمان الى فيها أقل من 100 رشاية ب 7 جنيه يبقى الجامو أرخص وأنضف، ورحت نازل على العتبة على عمكم ميشيل، دخلت المحل صغير بس كان في زحمة سألت شاب قلتله الرش الجامو بكم قالى الماتش ب 30 جنيه والثانى ب 40 قلتله ازاى أنا لسة متصل من شوية وحد رد عليه وقالى ب 25 جنيه قالى مين قلتله واحد كبير وبصيت لاقيت عم ميشيل قاعد قلتله أكيد الحاج الكبير لأن الى رد عليه صوت راجل كبير قالى روحله، رحت لعم ميشيل وقلتله مش أنا أتصلت بحضرتك من شوية وقلتلى الماتش ب 25 جنيه قالى ماشى وقال للشاب هاتله علبة رش ماتش على 25 جنيه وقلتله والرش الجامو المدبب جابلى علبة وقالى علشان خاطرك ب35 جنيه بدل 40 وفتحلى العلبة وورانى شكل الرشة ومميزاتها، قلتله بس يا استاذ ميشيل أنا كنت عامل حسابى على علبتين ب 50 جنيه المهم قلتله هاتلى علبة ماتش ثانى وأخدت علبتين على 50 جنيه وسألته على البنادق على النوريكا جيت نمرة واحدة مش عارف قالى 3750 قلتله قصدى نمرة واحد مش نمرة 2 قالى علشان خاطرك ب 3500 قلتله ليه السعر عالى كده، قالى انت عايزها بكم، قلتله أنا بسأل علشان لما أجى أشترى أنا أعرف ناس شرينها ب 1800 جنيه قالى الكلام ده من كم سنة قلتله من شهرين ثلاثة، قالى كل حاجة بتغلى والسلاح دلوقتى أغلى من الدهب وأشترى رش أو سلاح دلوقتى لأنك مش هتخسر لما تشترى حاجة لأن أسعارها بتعلى، المهم شاكرته وأدالى كارت فيه ارقام المحل ومشيت روحت، وأول ما روحت فتحت العلبتين وعدتهم رشة رشة، طلع واحدة فيها 257 رشة وواحدة فيها 250 رشة ورشة زيادة بس بايظة راسها مكسورة.

بس تجربتى على شكل الرش الماتش أنها ميفرقش كثير عن الرش المصرى من حيث النضافة، يعنى برده تحس أن الرشة بها بعض الرايش وراسها مش ناعمة مش زى الصورة الى مرسومة على العلبة، بس يعتبر شكلها مش معوج زى الرش المصرى.

هذه تجربتى النهاردة حبيت أنقلها للإستفادة.